Конья баҳсларида Ўзбекистоннинг неча нафар спортчиси қатнашади?

Конья баҳсларида Ўзбекистоннинг неча нафар спортчиси қатнашади?

Жорий йилнинг 9-18 август кунлари Туркиянинг Конья шаҳрида V Ислом бирдамлик ўйинлари бўлиб ўтади.

Дунёнинг 60 га яқин мамлакатидан спорт жамоалари қатнашадиган мазкур спорт ўйинларини юқори даражада ташкил этиш борасида Туркия спорт ташкилотлари, ўйинларни ўтказиш бўйича тузилган ташкилий қўмита томонидан кенг қамровли ишлар олиб борилмоқда. 
 
Ташкилий қўмита ўйинларнинг регламенти ва мусобақаларда қатнашадиган жамоалардан келиб тушган талабномалар асосида давлатлар номини эълон қилди. 
 
Маълумки, жорий йил Хитойда ўтиши керак бўлган ёзги Осиё ўйинларининг эпидемиологик вазият туфайли бир йилга кечиктирилиши Ислом бирдамлик ўйинларини йилнинг асосий спорт тадбири мақомига олиб чиқди. 
 
Бошқа давлатлар қатори мамлакатимиз спортчиларининг ҳам ушбу Конья баҳсларида муносиб иштирок этиши куннинг муҳим масаласига айланди. Бу борада Спортни ривожлантириш вазирлиги, Миллий Олимпия қўмитаси ҳамда спорт федерациялари ҳамкорлигида тайёргарлик дастури ишлаб чиқилди. Мусобақалар, ўқув-йиғин машғулотлари режаси тасдиқланди. 
 
Спортни ривожлантириш вазирлиги маълумотига кўра, V Ислом бирдамлик ўйинларида Ўзбекистон делегацияси 23 спорт турида 270 га яқин спортчилар билан қатнашиши режалаштирилмоқда. Эътиборлиси, улар орасида жамоавий спорт турларининг борлиги мамлакатимизда ушбу йўналишда олиб борилаётган ислоҳотлар самарасидир. 
 
Бўлажак ўйинларда юртимизнинг гандбол ва 3х3 баскетбол бўйича аёллар жамоаси медаллар учун кураш олиб боради. V Ислом бирдамлик ўйинлари низомига кўра, жамоавий спорт турларига ажратилган квоталар бўйича жаҳон рейтингидаги мос давлатлар танлаб олинди. Ушбу спорт турларининг эркаклар, шунингдек, волейбол ҳамда футбол бўйича ҳам эркаклар, ҳам аёллар жамоалари керакли рейтинг поғоналарига кўтарила олмагани боис бу йилги Ислом бирдамлик ўйинларида қатнаша олмайдиган бўлди. 
 
Тафаккур оламининг устунларидан бири Жалолиддин Румийга сўнгги макон бўлган Коньяда ўтадиган V Ислом бирдамлик ўйинларининг муросасиз беллашувларига қуръа ташлаш маросими жорий йилнинг 3 июлида бўлиб ўтади. 

Тўлқин Рўзиев, ЎзА