Туркиялик эксперт: Анқара ТДТ доирасида энергетика соҳасидаги ҳамкорликка жиддий эътибор қаратмоқда

Туркиялик эксперт: Анқара ТДТ доирасида энергетика соҳасидаги ҳамкорликка жиддий эътибор қаратмоқда

ТОШКЕНТ, 14 октябрь. /«Дунё» АА/. Тошкентда Туркий давлатлар ташкилотига (ТДТ) аъзо давлатлар ташқи сиёсатини ўрганиш расмий марказлари ва кузатувчиларнинг 8-йиғилиши давом этмоқда, деб хабар бермоқда «Дунё» АА мухбири.

Тадбирда сўзга чиққан Туркия Ташқи ишлар вазирлигининг энергетика ва кўп томонлама транспорт бўйича бош директорининг ўринбосари Юсуф Бурак Ренде ТДТ доирасида кўп томонлама ҳамкорликнинг муҳим йўналишларини ривожлантириш долзарблигини таъкидлади. Хусусан, у энергия соҳасида ўзаро боғлиқликнинг аҳамиятига алоҳида эътибор қаратди.

– Дунёдаги оғир геосиёсий ва геоиқтисодий нотинчлик шароитида Анқара муқобил энергия манбаларини кенгайтиришга катта аҳамият бермоқда. Халқаро энергия агентлигининг таҳлилларига кўра, Туркияда қайта тикланадиган энергия манбаларининг қуввати 2024 йилга бориб 49 фоизга (21 минг МВт) ошади. ТДТга аъзо бошқа мамлакатлар ҳам худди шундай салоҳиятга эга, чунки иқлим шароити ушбу энергия соҳасини ҳар томонлама ривожлантиришга имкон беради. ЮНЕП маълумотларига кўра, туркий давлатларда қуёшли кунлар йилига ўртача 300-320 кунни ташкил қилади, - деди у.

Эслатиб ўтамиз, Ўзбекистон Президенти ҳузуридаги Стратегик ва минтақалараро тадқиқотлар институти томонидан Ўзбекистонда илк бор ташкил этилган экспертлар йиғилишида Озарбайжон, Қозоғистон, Қирғизистон, Ўзбекистон, Озарбайжон, Қозоғистон, Қирғизистон, Озарбайжон, Туркия, Венгрия, шунингдек, ТДТ Котибияти ва бошқа мамлакатларнинг етакчи таҳлилий марказларининг 60 дан ортиқ таниқли вакиллари иштирок этмоқда.

Анжуманда Транспорт-логистика компаниялари раҳбарлари, халқаро экспедиторлар, автомобиль ташувчилар, логистика ассоциациялари вакиллари, шунингдек, Ўзбекистон олий ўқув юртлари, жумладан, Жаҳон иқтисодиёти ва дипломатия университети, Тошкент давлат шарқшунослик университети, Тошкент давлат транспорт университети каби олий ўқув юртларининг олим ва мутахассислари ҳам қатнашмоқда.