O‘zbekiston — ochiq va xavfsiz davlat: xalqaro e’tirof etilgan ishonch maskani

Bugungi globallashuv davrida mamlakatning jozibadorligi nafaqat iqtisodiy salohiyati yoki tarixiy merosi, balki fuqarolar va xorijlik mehmonlar o‘zini qanchalik xavfsiz his qilishi bilan ham belgilanadi. Aynan shu mezon O‘zbekistonning xalqaro maydondagi ijobiy imijini yanada mustahkamlamoqda.

Nufuzli Institute for Economics & Peace (Vision of Humanity) tomonidan e'lon qilingan Safety Perceptions Index 2023 reytingiga ko‘ra, O‘zbekiston 121 davlat orasida dunyoda birinchi o‘rinni egalladi. Tadqiqot World Risk Poll xalqaro so‘rovi asosida tuzilgan bo‘lib, u jinoyatchilik statistikasi emas, balki odamlarning kundalik hayotda o‘zini qanchalik xavfsiz his qilishini baholaydi.

Mazkur natija O‘zbekistonda so‘nggi yillarda amalga oshirilayotgan keng ko‘lamli islohotlar, jamoat xavfsizligini ta’minlash, zamonaviy infratuzilmani rivojlantirish va ochiq davlat siyosatining amaliy samarasidir.

Bugungi kunda O‘zbekiston xorijiy sayyohlar, investorlar va xalqaro hamkorlar uchun tobora jozibador manzilga aylanmoqda. Vizasiz rejimning kengayishi, elektron davlat xizmatlari, transport infratuzilmasining modernizatsiyasi hamda mehmondo‘stlik madaniyati mamlakatning xalqaro nufuzini yanada oshirmoqda.

Xalqaro ekspertlar ta’kidlashicha, bugungi turizm sanoatida xavfsizlik transport, mehmonxona va xizmat sifati qatori eng muhim mezonlardan biriga aylangan. Shu nuqtai nazardan, O‘zbekistonning Safety Perceptions Index reytingida dunyoda birinchi o‘rinni egallashi mamlakatning xalqaro turizm va investitsion jozibadorligini yanada mustahkamlaydi.

Qadimiy Ipak yo‘lining yuragi bo‘lgan O‘zbekiston bugun boy tarixiy meros, zamonaviy infratuzilma, ochiq iqtisodiyot va yuqori darajadagi xavfsizlikni uyg‘unlashtirgan yangi taraqqiyot modelini namoyon etmoqda.

O‘zbekiston — bu ishonch, barqarorlik va ochiqlik mamlakati.